ភ្នំពេញ៖ យុវជន ២នាក់ដែលជិះម៉ូតូបង្ហោះម៉ូតូកាលពីយប់ថ្ងៃទី៩ ខែឧសភា ត្រូវបាននគរបាលខណ្ឌទួលគោកហៅទៅសួរនាំហើយបន្ទាប់ពីបានលើកឡើងថាម៉ូតូដែលហោះកង់មុខជ្រុលបង្កគ្រោះថ្នាក់ចរាចរណ៍នោះដោយសារជាប់លេខទើបបានហោះ មិនមែនជាចេតនារបស់ខ្លួននោះទេ។

យុវជនទាំងពីរនាក់នោះត្រូវបានឃាត់ខ្លួនទៅសួរនាំនៅវេលាម៉ោងប្រមាណ ១២និង៤០នាទី ថ្ងៃទី១២ ខែឧសភានេះ ក្រោយពីយុវជនទាំងពីរនេះបានជិះម៉ូតូបង្ហោះតាមដងផ្លូវសាធារណ:បង្កភាពអាណាធិបតេយ្យក្នុងសង្គម ប្រព្រឹត្តនៅចំណុចលើដងផ្លូវលេខ២៤៥ ក្រុមទី១ ភូមិ១ សង្កាត់ផ្សារដើមគរ ខណ្ឌទួលគោក រាជធានីភ្នំពេញ កាលពីថ្ងៃទី០៩ ខែឧសភា ឆ្នាំ២០២៣ វេលាម៉ោងប្រហែល ២០:២០នាទី។

បច្ចុប្បន្នក្មេងទាំង ២នាក់ខាងលើ កំពុងឃាត់ខ្លួនជាបណ្ដោះអាសន្ន នៅអធិការដ្ឋាននគរបាលខណ្ឌទួលគោក ដើម្បីសាកសួរតាមនីតិវិធី។

គួរឱ្យដឹងដែរថាកាលពីថ្ងៃទី៩ ខែឧសភា កន្លងទៅមានករណីគ្រោះថ្នាក់ចរាចរណ៍មួយនៅសង្កាត់ផ្សារដើមគ ដែលត្រូវបានគេថតបានតាមផ្លូវឃើញសកម្មភាពបង្ហោះម៉ូតូរបស់ក្មេងទាំងពីរនាក់នេះ តែបន្ទាប់ពីត្រូវបានសួរនាំយុវជនម្នាក់ដែលជាម្ចាស់ម៉ូតូថាម៉ូតូម៉ាកហុងដា Dream របស់ខ្លួនមានបញ្ហាជាប់លេខ២ មូលហ្គាទៅហោះកង់មុខតែម្ដង៕